శ్రీశైలదేవస్థానం: ఈ ఓ సారధ్యం , అధికారగణం, సిబ్బంది సమన్వయం, భక్తుల సహకారంతో శ్రీశైల సంక్రాంతి బ్రహ్మోత్సవాలు మంగళవారం వివిధ కార్యక్రమాలతో ఘనఘనంగా ముగిసాయి. శ్రీస్వామిఅమ్మవార్లకు విశేష పూజలు, అశ్వవాహన సేవ, పుష్పోత్సవం – శయనోత్సవం ఈ రోజు ప్రత్యేకం. 18 రకాలకు పైగా పుష్పాలు, పలు రకాల పత్రాలతో స్వామి అమ్మవార్లను విశేషంగా అర్చించారు. 9 రకాల ఫలాలు నివేదన చేసారు. శ్రీ స్వామి అమ్మవార్లకు ఏకాంతసేవ నిర్వహించి శయనోత్సవం ఏర్పాట్లు చేసి ఉత్సవాలను దేవస్థానం ఘనఘనంగా ముగించింది.
మకర సంక్రమణ పుణ్యకాలాన్ని పురస్కరించుకుని ఈ నెల 12వ తేదీ నుండి నిర్వహిస్తున్న సంక్రాంతి బ్రహ్మోత్సవాలు వివిధ కార్యక్రమాలతో ముగిసాయి. ముగింపులో భాగంగా ఈ రోజు ఉదయం శ్రీస్వామిఅమ్మవార్లకు విశేష పూజలు జరిగాయి.
అశ్వవాహనసేవ:
వాహనసేవలో భాగంగా ఈ రోజు సాయంకాలం శ్రీ స్వామి అమ్మవార్లకు అశ్వవాహనసేవ నిర్వహించారు.
శ్రీస్వామిఅమ్మవారి ఉత్సవమూర్తులను అశ్వవాహనంపై వేంచేబు చేయించి ప్రత్యేక పూజాదికాలు చేసారు. తరువాత ఆలయ ప్రాంగణంలో ప్రాకారోత్సవం జరిగింది.
పుష్పోత్సవం – శయనోత్సవం:
ఈ రోజు సాయంకాలం ఆలయ ప్రాంగణంలోని అక్కమహాదేవి అలంకార మండపం వద్ద శ్రీ స్వామిఅమ్మవార్లకు పుష్పోత్సవం జరిపారు. పుష్పోత్సవంలో శ్రీస్వామిఅమ్మవార్లకు కాగడాలు, ఎర్రగులాబీలు, తెల్లగులాబీలు, పసుపు గులాబీలు, ఎర్రమందారం, తెల్లమందారం, ముద్దమందారం, నందివర్ధనం, గరుడవర్ధనం, కనకాంబరాలు, సుగంధాలు (లిల్లీ పూలు), పసుపుచేమంతి, ఊదాచేమంతి, తెల్లచేమంతి, ఎర్రగన్నేరు, తెల్లగన్నేరు, దేవగన్నేరు, ముద్దగన్నేరు, మల్లెలు, మొదలైన 18 రకాలకు పైగా పుష్పాలు, బిల్వం, మరువం, మాచిపత్రి, మొదలైన పలు రకాల పత్రాలతో స్వామి అమ్మవార్లను విశేషంగా అర్చించారు.
అరటి, తెల్లబో, నల్లద్రాక్ష, దానిమ్మ, కమల, జామ, ఖర్జూరం, యాపిల్, ఫైనాపిల్, మొదలైన 9 రకాల ఫలాలు కూడా నివేదించారు. తరువాత శ్రీ స్వామి అమ్మవార్లకు ఏకాంతసేవ నిర్వహించి శయనోత్సవం జరిపారు.
ఈ శయనోత్సవానికిగాను ఆలయప్రాంగణములోని స్వామివార్ల శయనమందిరానికి విశేష పుష్పాలంకరణ చేసారు.
*కుమారస్వామి పూజ ,నందీశ్వర పూజ , బయలు వీరభద్రస్వామి పూజ శాస్త్రోక్తంగా జరిగాయి. అర్చక స్వాములు సంక్రాంతి ముగింపు వేడుకలను ఆగమోక్తంగా జరిపారు.
