శ్రీశైల దేవస్థానం: బ్రహ్మశ్రీ సామవేదం షణ్ముఖశర్మ ‘ తొమ్మిది రోజుల ‘గణపతి గాథలు’ ప్రవచనాలలో భాగంగా ఆదివారం రెండో రోజు ప్రవచనాలు కొనసాగాయి.ఈ కార్యక్రమానికి ముందుగా ఆలయ సంప్రదాయాన్ని అనుసరించి జ్యోతిప్రజ్వలన చేశారు. తరువాత సామవేదం షణ్ముఖశర్మ ప్రవచనం చేశారు.
ఓంకారమే గణపతి ఆకారం ధరించిందని వేద పురాణాలు తెలియజేస్తున్నాయని, ఈ గణపతి అన్ని మంత్రాలకు అధిపతి అని పురాణం చెబుతోందన్నారు ప్రవచకులు. అనేక సమయాలలో విఘ్నాలను నివారించటం కోసం గణపతి అనేక రూపాలను ధరించాడని, ఆ రూపాలే గణపతి అవతారాలుగా గణేశ సంబంధిత పురాణాలలో ఉన్నాయని పేర్కొన్నారు. ఆగమాలు, అనేక పురాణాలు గణపతి తత్త్వాన్ని విశేషంగా చెప్పాయని అన్నారు.గకారంతో మొదలయ్యే గణపతి నామాలు ఆ స్వామి వివిధ రూపాలను తెలుపుతాయని వివరించారు. గణపతి అన్ని సంప్రదాయాల వారికి ఉపాసనా దేవతగా ఉన్నారని , , సర్వ విఘ్నహరుడిగా గణపతి ప్రసిద్ధికెక్కాడని పేర్కొన్నారు.ఇంకా తమ ప్రసంగంలో శ్రీశైల సంబంధిత గణపతి గాథలను, క్షేత్ర వైభవాన్ని, సనాతనధర్మం, వైదిక ఆచారాలకు సంబంధించిన పలు అంశాలను కూడా వివరించారు.