శ్రీశైల దేవస్థానం:• మహాశివరాత్రి బ్రహ్మోత్సవాలలో భాగంగా ఆరో రోజు గురువారం స్వామి అమ్మవార్లకు విశేషపూజలు జరిగాయి.
• సాయంకాలం పుష్పపల్లకీసేవ ఘనఘనంగా జరిగింది.
• లోక కల్యాణం కోసం రుద్రహోమం, చండీహోమం, జపాలు, పారాయణలు నిర్వహించారు.
• సాయంకాలం శ్రీస్వామిఅమ్మవార్ల గ్రామోత్సవం హుషారుగా సాగింది.
• గ్రామోత్సవంలో పలు సంప్రదాయ జానపద కళారూపాల ప్రదర్శన నిర్వహించారు.
• ఆలయ దక్షిణమాడవీధిలోని నిత్యకళారాధన వేదిక వద్ధ, పుష్కరిణి వేదిక వద్ద, శివదీక్షా శిబిరాల వేదిక వద్ద సాంస్కృతిక కార్యక్రమాల నిర్వహణ చక్కగా జరిగింది.
* పుష్పపల్లకీ సేవ:
మహాశివరాత్రి బ్రహ్మోత్సవాలలో భాగంగా రాత్రి శ్రీస్వామిఅమ్మవార్లకు పుష్పపల్లకీసేవ నిర్వహించారు.
ముందుగా ప్రత్యేకంగా అలంకరించిన శ్రీ స్వామిఅమ్మవార్ల ఉత్సవమూర్తులను అక్కమహాదేవి అలంకార మండపంలో వేంచేబు చేయించి ప్రత్యేక పూజలు చేసారు.
తదుపరి వివిధపుష్పాలతో అలంకరించబడిన పుష్పపల్లకి మేళతాళాలతో శ్రీ స్వామిఅమ్మవార్లను తొడ్కొని వచ్చి పుష్పపల్లకిలో ఊరేగింపు చేసారు.
విశేష సేవలో ఎర్రబంతి, పసుపు బంతి, తెల్లచేమంతి, పసుపు చేమంతి, కనకాంబరాలు, డచ్స్, అశోక పత్రాలు, కాగడాలు, గ్లాడియేలస్, అస్పెర్ గ్రాస్, జబ్రా, కార్నేషన్, ఆర్కిడ్స్, నందివర్ధనం, గరుడవర్ధనం మొదలైన పలు రకాల పుష్పాలను వినియోగించారు.
పురాణాలలో శ్రీశైల మల్లికార్జున స్వామివారు పుష్పప్రియుడని వుంది. ఈ కారణంగానే ఆయా కైంకర్యాలన్నీ శ్రీ స్వామివారికి పరిపూర్ణంగా అర్పింపజేయాలనే భావనతో మహాశివరాత్రి బ్రహ్మోత్సవాలలోనూ, దసరామహోత్సవాలలోనూ ఈ పుష్పపల్లకి సేవ నిర్వహిస్తున్నారు.
