శ్రీశైల దేవస్థానం: మహాశివరాత్రి బ్రహ్మోత్సవాలు ఎనిమిదో రోజు శుక్రవారం శ్రీ స్వామిఅమ్మవార్లకు విశేష పూజలు జరిగాయి.యాగశాల లో శ్రీచండీశ్వరస్వామికి ప్రత్యేక పూజాదికాలు జరిగాయి. అనంతరం లోక కల్యాణం కోసం జపాలు, పారాయణలు చేసారు.అనంతరం మండపారాధనలు, పంచావరణార్చనలు, శివపంచాక్షరి, నిత్యహవనాలు, రుద్రహోమం, చండీహోమం, కార్యక్రమాలు ఆగమ శాస్త్రం ప్రకారంగా జరిగాయి. ఈ సాయంకాలం ప్రదోషకాల పూజలు, జపానుష్ఠానాలు, రుద్రపారాయణలు, హోమాలు జరిపారు.
ప్రభోత్సవం:
మహాశివరాత్రి బ్రహ్మోత్సవాలలో భాగంగా ఈ సాయంత్రం శ్రీ స్వామిఅమ్మవార్ల ప్రభోత్సవం జరిగింది.
రథోత్సవంలో రథానికి చేసినట్లుగానే ప్రభోత్సవంలో కూడా ప్రభకు పలు రకాల పుష్పాలతో పుష్పాలంకరణ చేసారు.
ప్రభోత్సవంలో నాదస్వరం, కోలాటం, చెక్క భజన, శంఖం, ఢమరుకం, బీరరప్పడోలు, పగటివేషాలు, తప్పెటచిందు, డోలు విన్యాసాలు మొదలైన పలు సాంప్రదాయ జానపద కళారూపాలు కూడా ఏర్పాటు చేసారు.
నందివాహనసేవ
వాహనసేవలో భాగంగా శ్రీ స్వామిఅమ్మవార్లకు నందివాహన సేవ , ఆలయ ఉత్సవం ఘనంగా జరిగాయి. ఈ ఓ , ఇతర అధికార గణం, సిబ్బంది, భక్త జనం పాల్గొన్నారు.
