శ్రీశైలదేవస్థానం:మకర సంక్రమణ పుణ్యకాలాన్ని సద్వినియోగం చేసుకుని ఈ నెల 11వ తేదీ నుండి నిర్వహిస్తున్న సంక్రాంతి బ్రహ్మోత్సవాలు ఈ రోజు (17.01.2021)తో ఘనంగా ముగిసాయి. ఈ ఉత్సవాల ముగింపులో భాగంగా ఉదయం శ్రీస్వామిఅమ్మవార్లకు విశేష పూజలు జరిగాయి.
అశ్వవాహనసేవ:
ఈ బ్రహ్మోత్సవాలలో ,వాహనసేవలో భాగంగా ఈ రోజు సాయంకాలం శ్రీ స్వామి అమ్మవార్లకు అశ్వవాహనసేవ నిర్వహించారు.
ఈ సేవలో శ్రీస్వామిఅమ్మవారి ఉత్సవమూర్తులను అశ్వవాహనంపై వేంచేబుచేయించి ప్రత్యేక పూజాదికాలు చేసారు . తరువాత ఆలయ ప్రాంగణంలో ప్రొకారోత్సవం నిర్వహించారు.
పుష్పోత్సవం – శయనోత్సవం:
ఈ బ్రహ్మోత్సవాలలో భాగంగా ఈ రోజు సాయంకాలం ఆలయ ప్రాంగణంలోని అక్కమహాదేవి అలంకారమండపం వద్ద శ్రీ స్వామి అమ్మవార్లకు పుష్పోత్సవం జరిపారు.ఈ పుష్పోత్సవంలో శ్రీస్వామిఅమ్మవార్లకు కాగడాలు, ఎర్రగులాబీలు, తెల్లగులాబీలు, పసుపు గులాబీలు, ఎర్రమందారం, తెల్లమందారం, ముద్దమందారం, నందివర్ధనం, గరుడవర్ధనం, కనకాంబరాలు, సుగంధాలు (లిల్లీపూలు), పసుపు చేమంతి, ఊదాచేమంతి, తెల్లచేమంతి, ఎర్రగన్నేరు, తెల్లగన్నేరు, దేవగన్నేరు, ముద్దగన్నేరు మొదలైన 18 రకాల పుష్పాలు బిల్వం, మరువం, మాచిపత్రి, మొదలైన మూడు రకాల పత్రాలతో స్వామి అమ్మవార్లను విశేషంగా అర్చించారు. అదేవిధంగా అరటి, తెల్లద్రాక్ష, నల్లద్రాక్ష, దానిమ్మ, కమల, యాపిల్, ఫైనాపిల్,జామ, ఖర్జూరం మొదలైన 9 రకాల ఫలాలు కూడా నివేదన చేసారు.
తరువాత శ్రీ స్వామిఅమ్మవార్లకు ఏకాంతసేవ నిర్వహించి శయనోత్సవం జరిపారు.
ఈ శయనోత్సవానికిగాను ఆలయ ప్రాంగణములోని స్వామివార్ల శయన మందిరానికి విశేష పుష్పాలంకరణ చేసారు.
