ఏ ప్రాంతం నుంచి వచ్చి స్థిరపడిన వారినైనా అక్కున చేర్చుకుని, ఆదరించే సంస్కృతి హైదరాబాద్ సొంతమని, ఆ సంప్రదాయం మరింత గొప్పగా కొనసాగితీరుతుందని ముఖ్యమంత్రి శ్రీ కె. చంద్రశేఖర్ రావు అన్నారు

‘‘ఉద్యమం ప్రారంభించినప్పుడు జల దృశ్యంలోనే నా వైఖరి స్పష్టంగా చెప్పాను. పొట్టకూటి కోసం వచ్చే వారితో పేచీలేదు. పొట్టకొట్టే వారితోనే పంచాయితీ అని చెప్పాము. చాలా మంది తమ వైఖరి మార్చుకున్నారు కానీ, మేము మార్చుకోలేదు. అదే మాటకు కట్టుబడి ఉన్నాం. మేం ప్రభుత్వంలోకి వచ్చిన తర్వాత కూడా ఆ విధానాన్నే కొనసాగిస్తున్నాం. హైదరాబాద్ నగర అభివృద్ధిలో అందరి పాత్ర ఉంది. అనేక ప్రాంతాల నుంచి వచ్చి ఇక్కడ వ్యాపారాలు చేసుకుని స్థిరపడ్డారు. దాదాపు 300 ఏండ్ల నుంచి కూడా వివిధ ప్రాంతాల నుంచి వచ్చిన వారున్నారు. వారందరూ హైదరాబాద్ లో భాగమయ్యారు. వారందరికీ ప్రభుత్వం అండగా ఉంటుంది. పూలగుత్తిలో అన్ని రకాల పూలు ఒదిగినట్లే అన్ని ప్రాంతాల నుంచి వచ్చిన వారు హైదరాబాద్ కు వన్నె తెచ్చారు. రాజులు పౌరుషానికి ప్రతీక. అల్లూరి సీతారామరాజు వారసులు. అలాంటి క్షత్రియులు హైదరాబాద్ నగరానికి వన్నె తెచ్చారు. అర్థ శతాబ్దం నుంచి వచ్చిన క్షత్రియులు (రాజులు) కూడా అనేక రకాల వ్యాపారాలు చేస్తున్నారు. కోళ్ల ఫారాలు, ద్రాక్ష తోటలను హైదరాబాద్ కు పరిచయం చేసింది వారే. సినిమా, ఐటి, నిర్మాణ రంగాల్లో రాణిస్తున్నారు. హైదరాబాద్ లో భాగమయ్యారు. క్షత్రియులకు ప్రభుత్వం అండగా ఉంటుంది. అన్ని రంగాల్లో వారిని ప్రోత్సహిస్తాం’’ అని ముఖ్యమంత్రి ప్రకటించారు.

క్షత్రియ ప్రముఖులు రుద్రం రాజు శ్రీహరి రాజు, పెన్మత్స సోమ రాజు, బైర్రాజు సత్యనారాయణ, బంగార్రాజు, అప్పల్రాజు, సీతారామరాజు పాల్గొన్నారు.

<

>